Kooperatibako bazkide kolaboratzaile izango dira Arrasateko Udala eta Fagor Taldea. Horiek ordezkatuz hitza hartu dute Maria Ubarretxena Arrasateko alkateak eta Aritz Otxandiano Fagor Taldeko Iraunkortasun arduradunak.

Gainera, proiektuarekiko konpromisoa adierazteko aurkezpenean parte hartu dute baita ere Elena Herrarte Debagoiena 2030eko koordinatzaileak, Leintz bailarako gainontzeko herrietako alkateek –Unai Elkoro, Aretxabaletako alkatea; Joserra Zubizarreta, Eskoriatzako alkatea; eta Jon Sasiain, Leintz Gatzagako jarduneko alkatea–, Hodei Arzak Ekiolako zuzendari teknikoak, Natalia Diaz Arcaya Euskal Energiaren Erakundeko ordezkariak eta Monika Belastegi Goiena Komunikazio Taldeko presidenteak.

Trantsizio energetikoa da Debagoiena 2030en lan-ildo estrategikoetako bat, eta tokikotasunetik eragitearen garrantzia azpimarratu du gaurko htizartzean Elena Herrartek: “Zalantza gabe, gaur egun gizarte bezala daukagun erronka urgenteenen artean daukagu energia ereduaren trantsizioarena. Energia gure bizitzako arlo guztien oinarrian daukagu, industrian, garraioan eta baita herritarron etxeetan ere. Eta ikusten ari garen bezala, gure lurraldetik urruti dago gure oinarri energetikoaren kontrola. Horrek, herri bezala posizio ahulean uzten gaitu”.

Klima larrialdia eragiten duten faktoreen artean ere egungo energia eredua da eragile nagusi. Erregai fosiletan oinarritutako energia eredua da gurea, kontsumo oso intentsibokoa, eta horixe da hain zuzen karbono aztarnaren eragile printzipala. Horregatik, Herrartek azpimarratu du energia trantsizioa bultzatzea “beharrezkoa” dela eta “azkar eta ondo egiten asmatzea” dela erronka orain. Gaineratu du, “aurrera begira, energia eredua berriztagarria eta tokikoa izatea garrantzitsua” izango dela, eta garatuko diren baliabide energetikoak “tokiko herritar eta erakundeen esku egotea” ere bai.

Ekiolak bide hori jorratzen hasteko aukera eskaintzen du eta bailara ikuspuntutik proiektu “estrategikoa” dela esan du Herrartek. Azpimarra jarri du baita ere administrazio publiko-pribatuaren elkarlanean eta herritarren parte-hartzean: “Garapen komunitarioaren logiketan oinarrituko diren esperientziak bultzatu behar ditugu eskualdean: energia bertan sortu, kontsumitu eta baliabide horien inguruko erabakiak bertan hartuz. Horrek izan behar du etorkizuneko eredu energetikoaren oinarria”.

Herritarrak protagonista, erakundeen babesarekin

Leintz bailarak behar duen energia bertan sortzen hastea nahi da kooperatibarekin, eta modu horretan, kanpoko energia iturriekiko mendekotasuna murriztu. Hala, Maria Ubarretxena Arrasateko alkateak esan du bailarako lau udalek eta Fagorrek apustu garbia egin dutela “berriztagarria, iraunkorra eta bertan sortutakoa” den energiaren alde; hau da, “zero kilometroko energia berdea”. Leintz Bailarako Ekiola Kooperatibak 500 familia ingururi eskainiko dio zerbitzua.

Hori horrela izan dadin, Arrasateko Udalarenak diren lurretan plaka fotovoltaikoen eguzki-parke bat jarriko dute; zehazki, Garaia Berrikuntza Guneko lurretan, LKS parean.

Fagor Taldeak iraunkortasunarekin eta balio kooperatiboekin duen konpromisoa berretsi du, eta, hain zuzen, horren adierazle dira Leintz Bailarako Ekiola Kooperatibari egingo dion 335.400 euroko ekarpena eta proiektuan izango duen inplikazioa. Fagor Taldeko Aritz Otxandianok azaldu du Fagor 2030 iraunkortasun estrategian zehazten diren helburuekin bat egiten duela Ekiolak: “Fagorren konpromisoetako bat da, hain justu, gizartearen autoeratzea sustatzea, Garapen Iraunkorrerako Helburuak lortzeko palanka gisa. Horregatik erabaki dugu Ekiolan bazkide laguntzaile moduan parte hartzea, egitasmoari oinarri ekonomiko sendoa emango dion ekarpen ekonomiko esanguratsu bat eginez, eta baita ere Kontseilu Errektorean parte hartuz, kooperatiben administrazio eta kudeaketan daukagun esperientzia Leintz Bailarako Ekiolaren zerbitzura jartzeko. Proiektu honetan parte hartzean, ekarpen berri bat egiten diogu Debagoienari eta komunitateari”.

Bestetik, Ekiolako Hodei Arzakek zehaztu nahi izan du etxean ez dela inolako obra ez instalaziorik egin beharko, eta, energia kontsumoa 24 orduz ziurtatuta izango dutela familia bazkideek: “Leintz Bailarako Ekiola Kooperatibako bazkideek orain arte bezalaxe energia kontsumo normala ziurtatuta izango dute. Gainera, prezioa lehiakorra eta egonkorra izango da”.

Azkenik, EEEko Natalia Diaz Arcayak esan du gaurkoa “mugarri garrantzitsua” dela energiaren sorreran eta kudeaketan herritarren parte-hartzea bultzatzeko, eta Kooperatiba Europar Batasuneko politiken ildo beretik doala: “Krean-ek eta Energiaren Euskal Erakundeak Europako politikekin bat datorren irtenbide bat diseinatu dugu, kooperatiben eredua oinarri hartuta eta inguruko biztanleei energia garbia eta kontsumitzeko hurbilekoa sortzeko aukera emanez”.

Herritarrentzako hitzaldiak

Herritarrei aurrez aurreko informazioa eskaintzeko eta izan ditzaketen zalantzak argitzeko hitzaldiak egingo dira Arrasaten, Aretxabaletan, Eskoriatzan eta Leintz Gatzagan. Hitzaldietan azalduko da, besteak beste, zein abantaila dituen Ekiolako bazkide izateak, nola funtzionatzen duen, familia estandar baten faktura nolako izango litzatekeen… Era berean, kooperatibako bazkide izan nahi dutenei, jarraitu beharreko pausoak zeintzuk diren azaldu dizkiete.

• Arrasaten, maiatzaren 3an, 18:30ean, Amaia Udal Antzokian.
• Aretxabaletan, maiatzaren 10ean, 18:30ean, Arkupen.
• Eskoriatzan, maiatzaren 12an, 18:30ean, Antzokian.
• Leintz Gatzagan, maiatzaren 16an, 18:30ean, Kultur Etxean.

Hitzaldiak egiteaz gain, informazioa emateko bulego edo arreta-guneak ere irekiko dituzte lau herrietan.

Leintz Bailarako Ekiola Kooperatiba

Ekiolaren baitan kokatzen da Leintz Bailarako Ekiola Kooperatiba. Hain zuzen ere, Ekiola Eusko Jaurlaritzaren baitako EEE Energiaren Euskal Erakundeak eta Mondragon taldearen parte den Krean-ek sustatutako proiektua da. Leintzeko kasuan, Arrasateko Udalak eta Fagorrek, gainontzeko eragileekin batera, bailarako errealitatera egokitu dute proiektua. Gainera, Fagorrek eta Arrasateko Udalak bazkide kolaboratzaile figura hartu dute kooperatibari babesa eskainiz.